“Konstitusiya və Suverenlik İli” çərçivəsində Ekologiya və Təbii Sərvətlər Nazirliyinin təşkilatçılığı, “Socar Midstream Operations” MMC-nin əməkdaşlarının, Azərbaycan Dövlət İqtisad Universitetinin müəllim və tələbə heyətinin, ekokönüllülərin iştirakı ilə ağacəkmə aksiyası keçirilib.
Aksiya çərçivəsində Müşfiqabad qəsəbəsində Abşeron yarımadasının torpaq-iqlim şəraitinə uyğun Eldar şamı və zeytun ağacları əkilib.
Ağacəkmə aksiyasının məqsədi ictimaiyyətin diqqətini ətraf mühitin sağlamlaşdırılması, yaşıllıqların bərpası və artırılması məsələlərinə yönəltmək, həmçinin ətraf mühitin mühafizəsinə və karbon emissiyalarının azaldılması yolu ilə iqlim dəyişikliyinə qarşı mübarizəyə töhfə verməkdir.
Qeyd etmək lazımdır ki, Ekologiya və Təbii Sərvətlər Nazirliyi tərəfindən həyata keçirilən ağacəkmə aksiyaları 2026-cı ildə Bakıda keçiriləcək Ümumdünya Ətraf Mühit Günü və Ümumdünya Şəhərsalma Forumu (WUF13) ərəfəsində ölkəmizdə ekoloji təşəbbüslərin təşviqi, ətraf mühitin qorunması sahəsində ictimai fəallığın artırılması və yaşıllaşdırma tədbirlərinin davamlılığının təmin edilməsinə xidmət edir.
21
Noyabr
2025
